Reynismenn sigruðu Aftureldingu

Reynismenn hófu leik sinn í 2.deildinni í körfuknattleik í gær.  Farið var í N1 höllinni á Varmá Mosfellsbæ og heimsótt Aftureldingamenn. Bæði lið sýndu heldur ryðgaða takta í fyrsta leikhluta, en Reynismenn leiddu 17-18 eftir fyrsta leikhluta með flottum sprettum frá Alfreði Elíassyni og Ólafi G. Jónssyni.

Annar leikhlutinn var mjög svipaður hjá báðum liðum þar sem þau voru að fikra sig saman eftir sumarið og ekki mikið um tilþrif, en Reynismenn voru aðeins sprækari í öðrum leikhluta og leiddu í hálfleik 32-36. Í þriðja leikhluta byrjuðu Reynismenn af krafti og þá sérstaklega varnarlega, Alfreð átti mjög góðan 3.leikhluta og var Rúnar Ágúst duglegur á að finna hann sóknarlega. Mikil barátta var í Reynismönnum í þessum leikhluta og voru menn duglegir að fleygja sér á eftir boltum og vinna lausu boltanum sem skilaði svo í kjölfarið auðveld tækifæri sóknarleg.

Staðan eftir 3. leikhluta var 38-55 fyrir Reynismönnum en þeir leyfðu bara Aftureldingu að skora 6 stig í fjórðungnum. Þegar 4.leikhluti byrjaði voru Reynismenn enn nokkuð ferskir á meðan Aftureldingamenn voru orðnir nokkuð þreyttir, það má alveg færa rök fyrir því að hörð vörn Reynis í 3.leikhluta hafi dregið nokkuð af þeim. Í 4.leikhluta hélt sama barátta áfram hjá Reyni sem kláruðu leikinn með sæm og lokatölur voru 49-80 og fyrsti sigur Reynis kominn í hús timabilið 2014-15. Þetta var sigur liðsheildarinnar þar sem menn voru duglegir að vinna fyrir hvorn annan.

Stigaskor Reynis:

  • Alfreð Elíasson 28 stig
  • Rúnar Ágúst Pálsson 14 stig
  • Egill Birgisson 14 Stig
  • Ólafur Geir Jónsson 13 stig
  • Hinrik Albertsson 6stig
  • Einar Örn Einarsson 4 stig
  • Elvar Þór Sigurjonsson 1 stig